რუსეთის აგენტების ქსელი საქართველოში - გამომძიებელი ჟურნალისტები მუშაობენ კვლევაზე, რომლის საბოლოო მიზანია საქართველოში ეფ-ეს-ბეს და გრუ-ს აგენტების და მათი კავშირების დადგენა. პირველი მონაცემები უკვე არსებობს - გავლენიანი საგამოძიებო გამოცემის ერთ-ერთი ხელმძღვანელი ღიად ადასტურებს, რომ კრემლის სპეცსამსახურებისთვის საქართველო დიდი ინტერესის საგანია და ყვება, რა ფორმით საქმიანობენ თბილისში რუსეთის აგენტები. ჯერ არ არის ცნობილი, როდის დასრულდება კვლევა და გამოქვეყნდება თუ არა სახელები, მაგრამ ფაქტია, რომ გამომძიებელმა ჟურნალისტებმა უკვე გამოააშკარავეს და დაასახელეს ევროპის სხვადასხვა ქვეყნებში მოქმედი მზვერავების რამდენიმე ჯგუფი.
"ბელინგ ქეთის" და "ინსაიდერის" გამომძიებელი ჟურნალისტების ინფორმაციით, საქართველოში რუსული სპეცსამსახურები აქტიურად ახორციელებენ ინფილტრაციას პოლიტიკურ და საზოგადოებრივ ჯგუფებში, მათ შორის, აქტიური კავშირი აქვთ ზოგიერთ პოლიტიკურ პარტიასთანაც. ინსაიდერის მთავარი რედაქტორი "პოსტ ფაქტუმთან" ინტერვიუში აცხადებს, რომ მათ აქვთ ინფორმაცია რუსული სამხედრო დაზვერვის აგენტების საქართველოში შემოსვლისა და საქმიანობის შესახებ.
"ჩვენ ვხედავთ საკმაოდ დიდ აქტივობას საქართველოში და აქ საუბარია არა მხოლოდ ეფ-ეს-ბე-ს მეხუთე სამსახურზე, არამედ გრუ-ზე, რაც გაცილებით უფრო მძიმე აღსაქმელია, რადგან გრუ-ს ხალხი პირდაპირ არის დაკავებული სამხედრო დივერსიებით. ჩვენ გვაქვს მონაცემები მათი საქართველოში ჩამოსვლის შესახებ, საზღვრის კვეთაზე- ირიბი მონაცემები, ასევე კომუნიკაცია ზოგიერთ პოლიტიკურ პარტიასთან და ასევე შეხვედრები ქართული წარმოშობის ადამიანებთან მოსკოვში" ამბობს "პოსტ ფაქტუმთან" საუბარში რომან დობროხოტოვი, "ინსაიდერის" შეფ-რედაქტორი.
გამომძიებელი ჟურნალისტების ამავე ჯგუფმა უკვე გამოავლინა კრემლის სასარგებლოდ მომუშავე აგენტები გერმანიის ულტრამემარჯვენე პარტია ა-ეფ-დეში, ასევე რუსულ ეფსებთან კავშირში ამხილა ევროპარლამენტარი ლატვიიდან.
[media=
]